考好DSE中國語文卷一：4招教你寫出高分記敘文

記敘文係DSE中國語文卷一每年必出嘅熱門題型，喺考評會議入面，試卷主席更指出每年揀作記敘文嘅考生有接近70%！因此，今日就教下大家點樣寫出高分記敘文，幫大家考好DSE！

1. 說理為主，抒情為輔

2 大家通常會將每年DSE作文題目嘅Q1稱為「記敘抒情文」。但其實呢個概念係錯嘅，因為咁多年嚟考評局出嘅記敘式題目都無要求過大家「抒情」?；相反，每年嘅記敘寫作題都係要求大家「說理」－即係透過敘事帶出處世道理。例如2012年要帶出中國文化可貴的一面、2013年要帶出「己所不欲，勿施於人」等等。因此，大家作記敘文嘅時候，千祈唔好將篇幅集中喺「感情」嘅抒述，而應該集中透過敘事「說明道理」。

2. 設計反省段，清晰說理

承上，由於DSE嘅記敘文寫作主要係想大家透過敘事「說理」，因此，我會建議各位同學喺文章中後段加入「反省段」－意思即係主角經歷事件之後，內心嘅獨白。再講白少少，就係叫大家喺寫完件事之後，用返200-300字去說明件事帶出左啲咩道理。反省段唔要求寫得文筆優美，但就要求各位闡述清晰，「畫公仔畫出腸」，將文章立意由頭到尾說明一次，咁先能夠令考官清晰了解你的文章主題，幫你喺考試入面拎分。

3. 善用比喻及對話

喺DSE中文科入面，記敘文比說理文更要求各位喺文筆上多下工夫。而最常用喺記敘文入面嘅寫作手法就係「善用比喻」同「多用對話」啦！曾經見過有同學寫記敘文，一句對白都無，淨係一味敘事。但如果你文字功力無返咁上下，係好難寫出一篇無對白而又生動嘅文章。因此，大家寫記敘文時不妨多設計對話情節，一嚟令文章生動啲，二嚟亦都可以諗少啲修辭位(因為對話入面通常都係直述/問句，正常人講野唔會話「丫，我真係焦急到有如熱鍋上嘅螞蟻啊！」架嘛！)，係咪？

4. 練習「機械式寫作模式」

最後，其實每年嘅記敘文寫作題目都大同小異，分別只在於限制同立意有所不同。因此，如果大家只求喺DSE中文科入面拎高分，其實係應該設計定兩、三套既定嘅寫作模式，諗定曬邊啲位用對話，邊啲位用比喻，邊啲位要寫長啲，邊啲位要寫短啲… …然後用呢套模式不斷寫唔同嘅題目，不斷改良，務求最後喺文憑試入面能夠成為一個「機械人」?，倒模咁倒篇文出嚟，咁就自然唔會唔夠時間寫或者令文章詳略失衡啦！