如何獲取好成績DSE中文科中文卷二：4個寫好說理文的方法

說理文係每年文憑試卷二必出文體，咁到底考評局要求一篇高分嘅說理文要有咩元素呢？曾經聽過有老師話高分說理文唔應該舉實例，因為大家都識背例子；相反，說理文應該用多唔同寫作手法，例如比喻、排比等等，透過文筆豐富文章。到底佢所講嘅又岩唔岩呢？

其實，心水清嘅同學就會知道，以上既觀點係錯既！因為響卷二評分準則入面，內容係佔最高分，其次先係表達。咁單單文辭豐富又點能夠蓋過內容上嘅不足呢？其實，考評局對說理文既要求不外乎以下四點：

1. 立場清晰

近年黎既說理文題目，總係會叫大家對於某啲觀點作出評價，因此，要寫一篇高分既說理文，首先就要有一個清晰嘅立場。大家千祈唔好以為立場清晰好容易做到呀！立場清晰，唔單單係指你要響文章初段表達自己對題目既看法，更加重要嘅係全篇文章唔可以出現立場矛盾。而一般同學最常犯嘅毛病就係寫到中段開始亂寫，結果令文章內容同前文有矛盾，咁立場就會變得含糊啦！

2. 闡述深入

說理文，顧名思義即係用黎說明道理。要帶出大道理，唔需要睇書，但係就需要用較長篇幅，深入咁闡述、解釋。大家一定要記住，千祈唔好以為講完個Point好勁好獨特就有人明。你一定要一層一層咁深入解釋返你嘅論點。仲記唔記得以前中三學過既演繹論證？即係果啲「大前提」、「小前提」呢！用返相關概念去解釋就岩啦！

3. 例證豐富

作為一篇具說服力嘅文章，豐富嘅實例必不可缺。注意，係實例，而唔係你作出黎嘅「我的朋友小明也有相似經歷……」呀！當然，淨係舉實例唔夠嘅，舉嘅時候仲要留意：第一，例子要扣題，唔好以為舉一堆成功人士出黎就當舉好多例子。例子全部都要扣返題旨，如果唔係就無辦法幫你論證你嘅論點架啦；第二，要用自己文字解釋例子點樣對題。呢點亦都好重要，因為好多同學成日以為背左個對題嘅例子就算，無作任何解釋，咁樣亦都無辦法為你取得任何分數架！

4. 結構清晰

最後，大家寫說理文既時候結構應該盡量清晰。簡簡單單嘅「入題➡立場➡論點sss➡總結」就已經OK，唔洗話專登用d好複雜嘅結構。因為，說理文主要係用黎說明道理，結構當然越清晰就越易明啦！